Sport

Ekipi i Flamurtarit shuan shpresat e Kukësit për titull

10:30 - 15.04.19 Gazeta Shqiptare

Dy perla vlonjate, dy gola për të thyer Kukësin dhe për të festuar si gjithnjë në mënyrë unike. Motivi këtë herë ndryshon, pasi festa apo mesazhi është i qartë “leku letër”. Flamurtari feston një ditë përpara premtimit të administratorit Idrizi, i cili theksoi se të hënën do të shpërndajë rrogat, mbase ky ishte një motiv ekstra për të dhuruar një tjetër paraqitje fantastike, më saktë arritën një rezultat fantastik, një fitore 1-2 në transfertë kundër Kukësit ka gjithnjë një shije të veçantë. Ekipi i Ilir Dajës zgjohet pikërisht në momentin më përcaktues të sezonit, 3 fitore në 3 ndeshjet e fundit kanë bërë që kuqezinjtë të blindojë vendin e tretë. Jo vetëm kaq, por tashmë i ushtrojnë presion nga pranë Kukësit, diferenca është vetëm një pikë.



Ajo që ka bërë Flamurtari këtë sezon është një model frymëzimi, tetë muaj pa u paguar dhe me një ekip thuajse të shpërbërë pas merkatos së janarit, e të jesh në këtë nivele është diçka që nuk ndodh shpesh në futbollin shqiptar. Ilir Daja besoi deri në fund, tani është momenti i duhur për të shpërblyer këtë ekip, të paktën të marrin atë që i takon. Kukësi lan sërish duart me titullin, ajo fitore kundër Laçit ishte thjeshtë një mirazh, sepse jo vetëm që nuk arritën të zvogëlonin diferencën me Partizanin, por tashmë e shohin 12 ‘kate’ larg. Titulli tashmë thjesht një kujtim i larg për verilindorët. Në një sfidë ku Kukësi ishte dominues në çdo aspekt, ku për 30 minuta zhvilloi një presion asfiksues në zonën e Koliqit, ai që bëri diferencën ishte një “xhevahir” si Sukaj. Sulmuesi shkodran shtrin Cuculin në minutën e 39-të, duke kaluar Flamurtarin në avantazh. E njëjta muzikë edhe në pjesën e dytë, Kukësi ka kontrollin e lojës, por ekipi i Ernest Gjokës çahet pikërisht në zemër të mbrojtës, në minutën e 49-të ai që bën fenomenin në zonë ishte Musta. Verilindorët u rikthyen në lojë në minutën e 69-të me një aksion model, Shkurtaj shërbeu në zonë për Rexhinaldon, i cili ngushtoi diferencat në 2-1, një gol që shërbeu vetëm për suspancë, pasi asgjë nuk ndryshoi deri në fund, Kukësi bie sërish.

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *

This site uses Akismet to reduce spam. Learn how your comment data is processed.