Zjarri i madh që shkatërroi pjesërisht katedralen e Notre Dame në Paris, pothuajse është shuar në orët e para të mëngjesit të kësaj të marte.
Ka ende disa vatra të vogla zjarri, por autoritetet kanë deklaruar se situata është në kontroll.
Si pasojë e zjarrit, është shkatërruar dy e treta e tavanit, aq sa të hënën u mendua se mund të digjej e gjithë katedralja.
Ndonëse kjo gjë nuk ka ndodhur, Sekretari i Shtetit për Ministrinë e Brendshme, Laurent Nuñez, ka thënë mëngjesin e kësaj të marte se ka dyshime se si do të rezistojë struktura.
Prokuroria e Parisit ka nisur hetimet për zjarrin, ndërsa policia ka hedhur hipotezën se gjithçka nisi gjatë punimeve për restaurimin e kambanores së katedrales.
Ditët në vijim do të tregojnë saktësisht dëmin e shkaktuar nga flakët, ndërkohë këto foto tregojnë se çfarë ka mbetur nga Katedralja deri më tani.