Deputetja dhe ish-ministrja e Kulturës Mirela Kumbaro ka reaguar sa i takon kalimit të makinave të tonazhit të rëndë në zonën historike të Gjirokastrës. Përmes një postimi në “Facebook”, ajo sqaron gjithë situatën duke i kaluar një pjesë të përgjegjësisë bashkisë.
“Edhe një herë për kalldrëmet e Gjirokastrës, fiksimin e gjirokastritëve por edhe timin. Javën që shkoi doli një sëkëlldi e re: një pjesë e kalldrëmit, para zyrave të Këshillit të Qarkut, që ishte riparuar pjesërisht para 3 javësh, duket se ka çaluar në ‘qëndisjen’ e gurëve dhe padyshim kjo na shqetëson, sidomos kur shohim nga ana tjetër, se me sa kujdes po bëhet kalldrëmi në të gjithë Qafën e Pazarit, ku mjeshtra nga Gjirokastra e Berati, po punojnë gur, gur për ta bërë rruazë”, shkruan deputetja e PS.
Në përgjigje të mesazheve që ka marrë nga miq gjirokastritë, Kumbaro thotë se ka kontaktuar përgjegjësit e kompanisë zbatuese të projektit të cilët i shpjeguan se pikërisht në atë pjesë të kalldrëmit, që do duhej të ishte i bllokuar për qarkullimin e makinave derisa të mbyllej procesi i punës, kanë kaluar makina të tonazhit të rëndë dhe kjo ka sjellë dëmtim të pjesshëm të kalldrëmit ende të pastabilizuar.
“Natyrisht që ajo pjesë e kalldrëmit të dëmtuar do të shqepet dhe do të bëhet sërish nga e para, dhe do të garantohet pa dyshim cilësia dhe fortësia, njësoj si në pjesën tjetër, ku çdo ditë admirojmë punën e ustallarëve duarartë. POR, dua të tërheq vëmendjen sidomos të Bashkisë Gjirokastër, që të jetë bashkëpunuese me kompaninë dhe ustallarët me qëllim që të mos lejohet qarkullimi i automjeteve ndërkohë që kantieri është i hapur, por edhe që duhet të punojë për të përgatitur komunitetin dhe tregtarët që Qafa e Pazarit të bëhet përfundimisht këmbësore”,-shkruan Kumbaro. Sipas saj, nuk ka kuptim që në një anë punohet e në anën tjetër policia bashkiake u hap udhë automjeteve të rënda.
“Është e domosdoshme që të jemi të gjithë bashkëpunues e mirëkuptues për të mirën e projektit më të madh të restaurimit që është bërë në Gjirokastër, nëse e duam vërtet cilësinë e punës.
Nuk mbrohet puna vetëm duke sharë e fyer në ‘Facebook’ ata që punojnë, e ca më keq duke fërkuar barkun djallëzisht kur një gur shkon shtrembër, por duke qenë konstruktiv e bashkëpunues në terren. Ndjek çdo ditë punimet e kalldrëmeve në Gjirokastër, sepse është punë delikate, por edhe sepse, tashmë prej 3 vjetësh, Qafa e Pazarit është kthyer në një tablo të bukur që restaurohet si në një laborator të hapur ku marrin pjesë: mjeshtrat e ustallarët të cilëve nuk u ndihet zëri po u shihet puna, gjirokastritët që duhet të jetojnë çdo ditë me sfidën e kantierit në zemër të qytetit, turistët që megjithatë nuk i ndalin shëtitjet e tyre dhe fjalët e mira për qytetin që magjeps, të gjithë ne që i nisëm, i projektuam, i investuam por dhe kemi padyshim përgjegjësinë t’i mbikëqyrim dhe t’i ndjekim projektet deri sa të bitiset me sukses kjo punë, siç mbyllëm mbarë e bukur edhe fasadat, çatitë e objektet e Pazarit”,-thekson Mirela Kumbaro.
“Në fund”, thotë ajo, “natyrisht edhe të pakënaqurit e përjetshëm që mezi presin të gjejnë qimen që pastaj të shtyjnë kohën në “Facebook” për ta bërë tra.”