Me ftesë të Presidentit Ilir Meta, në Tiranë janë mbledhur lidërat kryesorë të Ballkanit dhe përfaqësues të lartë të Europës në kuadër të procesit të Brdo-Brijunit.
Ky proces është një nismë rajonale bashkëthemeluar nga Presidentët slloven dhe kroat, për shkak të problemeve të njëjta që shqetësonin vendet e Ballkanit.
Procesi “Brdo” filloi në janar 2010 në takimin e kryeministrave të atëhershëm të Sllovenisë dhe Kroacisë, Bohut Pahor dhe Jadranka Kosor. Qëllimi i këtij procesi ishte sigurimi i mbështetjes për sigurinë dhe bashkëpunimin midis vendeve të ish-Jugosllavisë dhe Shqipërisë. Me hyrjen e anëtarësimit të plotë të Kroacisë në Bashkimit Evropian (BE), procesit ju vendos emri Brdo Brijuni.
Në vitin 2014, Samiti u mblodh në Dubrovnik me kryefjalë integrimi evropian dhe bashkëpunimit rajonal, ndërtimi e një infrastrukture moderne rajonale, politikat e energjisë së Bashkimit Evropian si dhe qasjeve rajonale për sigurimin e energjisë dhe integrimin në rrjetin energjetik evropian.
Në vitin 2015, Samiti u mblodh në Zagreb, kryeqytetin e Kroacisë me fokus çështjet e sigurisë dhe luftës ndaj terrorizmit, me pjesëmarrjen e zëvendëspresidentit amerikan të asaj kohe, Joe Biden.
Në 2016, u zhvillua në Sarejevë, të Bosnje-Hercegovinë, ku liderët e Ballkanit diskutuan për sigurinë dhe bashkëpunimin rajonal.
Në vitin 2017, Brdo-Brijuni u mblodh në Slloveni, ku në deklaratën e përbashkët u ra dakord për forcimin e bashkëpunimi në rajon dhe shmangies së retorikave nacionaliste.
Në prill të vitit 2018 takimi i liderëve të vendeve anëtare të Procesit Brdo-Brijuni u zhvillua në Shkup, të Maqedonisë. Qëllimi i takimit të vitit 2018 ishte integrimi evropian i vendeve të rajonit dhe stabilizimi i situatës në Ballkanin Perëndimor nëpërmjet forcimit të bashkëpunimit rajonal dhe tejkalimit të çështjeve të pazgjidhura.
Këtë vit, Samiti i Brdo-Brijunit mbahet në kryeqytetin shqiptar, organizuar nga presidenti Ilir Meta.
Përveç drejtuesve të vendeve të Ballkanit, në Tiranë ka mbërritur dhe Përfaqësuesja e Larta e Bashkimit evropian, Federica Mogherini si dhe presidenti polak, Andrzej Duda.
Pritet që udhëheqësit e Ballkanit Perëndimor të miratojnë një deklaratë të përbashkët drejtuar Komisionit Europian, duke kërkuar që anëtarësimi i rajonit të mbetet në rendin e ditës së BE-së, pasi perspektiva europiane e tij konsiderohet e rëndësishme jo vetëm për stabilitetin e rajonit por dhe të vetë Bashkimit Europian.