Kulturë

Driant Zeneli bën për vete mediat në bienale

20:00 - 14.05.19 Gazeta Shqiptare

Fatmira Nikolli – Artribune”, “Curamagazine”, “Il Messagero”, “The Art Newspaper France”, “Le Figaro”, “ArtRevieë”, “Il Manifesto” janë disa prej medieve të huaja që kanë shkruar për pavijonin shqiptarë në Bienalen e Venecias. Vepra, tema dhe trajtimi i saj duket se kanë bërë për vete mediat dhe vizitorët. “Çështja nuk është më trajtohen Bulqiza e Metalurgjiku i Elbasanit, si zona ku ndodhin tragjedi. Çështja është t’i trajnojmë njerëzit që janë aty me dinjitet, ata e meritojnë”. Ky ishte një ndër qasjet e artistit Driant Zeneli. Kërkesa e Driantit ka qenë zhbërja e limiteve të njeriut dhe gjetja e ëndrrave për të treguar dinjitetin e njerëzve të thjeshtë, që jetojnë larg nesh e që bartin në shpirt një pasuri të madhe emocionale. “Sigurisht që jemi ne që i ndërtojmë muret rreth e rrotull, jemi ne që i hedhim muret. Kur them unë që çdo të thotë të jesh hero e të spostosh çdo ditë limitin tënd, që është një element i rëndësishëm të vepra ime”, thoshte ai 1 muaj më parë për “GSH”.



CEREMONIA
Është e bukur që Shqipëria prezantohet në këtë kozmos artistik me një vepër që lind në Bulqizë dhe tejkalon kufijtë lokalë, për të përcjellë një mesazh shumë më universal”. Ministrja e Kulturës, Elva Margariti, e nisi kështu fjalën e saj në ceremoninë e çeljes së pavijonit shqiptar në Bienalen e Venecias, të premten. Pavijoni u hap në praninë e artistëve shqiptarë e të huaj e nën vëmendjen e mediave ndërkombëtare. Në këtë edicion të 58-të, Shqipëria përfaqësohej me artistin Driant Zeneli me videoinstalacionin “Maybe dhe Cosmos is not so extraordinary”, kuruar nga Alicia Knock. Ministrja e Kulturës, Elva Margariti, tha se “ju falënderoj që jeni këtu për të mbështetur të bukurën që arti shqiptar krijon dhe e përfaqëson në këtë paradë të artit botëror. Jam e kënaqur që përfaqësohemi me Driantin, një i ri energjik, një talent i zbuluar prej kohësh, i përkushtuar ndaj artit të tij, që po na mirëpërfaqëson në këtë ngjarje, çka po e dëshmojnë dhe shkrimet e shumta të mediave të huaja. I bashkohemi kësaj bienaleje me një thyerje dimensionesh, duke sjellë histori të vogla, nga qytete të vogla e duke i kthyer në art bashkëkohor dhe në dimensionin e së bukurës. Jemi të ndërgjegjshëm që arti i tij sjell edhe një polemikë, mbi të cilën do të doja të reflektonim dhe të diskutonim”. Kuratorja Alicia Knock nga ana e saj u shpreh se vepra e Zenelit shpreh se si ëndrrat mund të bëhen realitet. “Vepra e Driantit flet për një realitet specifik të Shqipërisë, të Bulqizës, të kromit, që udhëton nga zemra e malit drejt kozmosit”, thotë Knock, teksa përshkruan një udhëtim gjeopolitik, ekonomik, industrial, në veprën e Zenelit. Për vetë artistin Driant Zeneli, “ky kozmos nuk është ndërtuar vetëm nga unë, por shumë persona që kemi punuar për një vit për të realizuar këtë vepër, duke filluar nga këta 5 heronj që janë protagonistë të veprës. Vepra ime u dedikohet të gjithë atyre që besojnë në ëndrra dhe kërkojnë çdo ditë të shtyjnë limitet e tyre”, u shpreh ai. Në ceremoninë e hapjes merrnin pjesë artistët Anri Sala, Adrian Paci, Edi Muka, Alban Muja, Anila Rubiku, etj. Kuratori Edi Muka vlerësoi metaforën e përdorur nga Zeneli për të lidhur nëntokësoren me mbitokësoren.

Artisti Anri Sala u ndal te mënyra se si është lidhur tema e zgjedhur nga Zeneli me temën e përgjithshme të Bienales, me shqetësimet dhe problemet që trajton ky edicion, por edhe përpjekjen për të gjetur alternative të tjera. Ndërsa artisti Adrian Paci e quan një gjetje konceptin e veprës së Driant Zenelit, që lidh realitetin me fantazinë, nëntokën e Shqipërisë me kozmosin. Përfaqësuesi i Kosovës në Bienalen e Venecias, Alban Muja, vlerësoi jo vetëm konceptin e veprës, por edhe instalimin e pavijonit.

“You Live In Interesting Times” është titulli i edicionit të 58-të të Bienales së Venecias dhe i referohet një mallkimi antik kinez, që evokon kohëra pasigurish, krizash dhe kaosi; “kohë interesante”, si këto që po jetojmë. Ky edicion kurohet nga Ralph Rugoff, nën presidencën e Paolo Baratta-s. Sipas Rugoff, “ndoshta arti, në mënyrë indirekte mund të kthehet në një guidë se si të jetojmë e të mendojmë”.
Në këtë edicion marrin pjesë 90 shtete, të vendosur në Giardini e Arsenale. Ndërsa 21 ngjarje kolaterale zhvillohen nëpër Venecia.

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *