Një ventrilokuiste ka lëvizur shijet artistike të këtij metropoli. Daljet televizive garantojnë audiencën duke bërë për vete ndjekës dhe adhurues të një gjinie krejt të veçantë të fjalës artistike. E ftuar në emisionin “Dikush” të “Gazeta shqiptare.al” në “Youtube” na jep mundësinë të njohim më shumë mbi jetën e saj përtej skenës. Një vajzë që me shumë vullnet ngriti studion e saj të aktrimit, kurseve për fëmijë apo edhe të folurën në publik, flet për besimin e humbur tek të tjerët.
Me zë të fortë përgjigjet: ”Nuk më vret besimi i dikujt më shumë se besimi tek vetja. Unë kam hequr dorë nga ajo se çfarë mendon dikush për mua, më duhet çfarë mendoj unë për veten time dhe çfarë u ofroj unë njerëzve.” Sipas Arjetës e rëndësishme është të mbash moralin lart. Në fund, kur diçka thyhet, ka një gjuhë komunikimi, kur palët janë mirë me veten. Me humor, shpall në kërkim “besimin e humbur”, duke krijuar një situatë komike në studio.
