Kur vjen puna te prindërimi, në të shumtën e rasteve vëmendja përqëndrohet te mamatë. Por sapo fëmija i parë vjen në jetë edhe për baballarët ndryshojnë shumë gjëra, e kjo ndodh me shpejtësi. Për burrat është një nga periudhat kur kanë më shumë nevojë për mbështetje nga familjarët e kolegët, por mbi të gjitha nga miqtë.
Një studim shqetësues ka dalë në përfundimin se një në pesë burra britanikë humbasin miqtë e ngushtë sapo bëhen prindër.
Sipas studimeve, mungesa e miqve të ngushtë e bën edhe më të dukshëm stresin e pashmangshëm që sjell prindërimi.
Në këtë sondazh morën pjesë 4000 meshkuj, ndërsa ¾ e të intervistuarve thanë se niveli i tyre i stresit ishte rritur pasi u bënë prindër.
Aktualisht në Angli, rezulton se një në tetë meshkuj kanë probleme të shëndetit mendor, ku vetëvrasja është shkaku më i shpeshtë i vdekjeve të burrave të moshës 20-49 vjeç.
Kjo do të thotë se është më e rëndësishme se kurrë që burrat të flasin për shëndetin mendor. Shoqëritë e ngushta mes burrave janë një mbështetje shumë e madhe për ata që bëhen baballarë të rinj.
