Bankat duket se kanë nisur të lehtësojnë kushtet për kredimin e ekonomisë. Ky është një nga sinjalet e para që për daljen e kreditimit nga stanjacioni. Sipas të dhënave nga Banka e Shqipërisë mësohet se, në fund të muajit maj portofoli i kredisë për ekonominë arrit në afro 549 miliardë lekë, 1.7% më shumë krahasuar me të njëjtën periudhë të një viti më parë. Gjatë një muaji, totali i kredisë bankare u rrit me mbi tre miliardë lekë. Sipas të njëjtave të dhëna mësohet se rritja e kredisë ishte e shpërndarë në të gjitha kategoritë kryesore të klientëve, çka ndoshta dëshmon shenja të një përmirësimi të ngadaltë, por të qëndrueshëm të tregut. Veçanërisht domethënëse është kthimi i rritjes pozitive në portofolin e bizneseve. Kredia për sipërmarrjet private ka arritur në 327 miliardë lekë, në rritje me 2.5% ndaj të njëjtës periudhë të një viti më parë. Huadhënia në segmentin e biznesit përbën rreth 60% të portofolit total të kredisë dhe për momentin ka një rol përcaktues në rritjen e kreditimit të ekonomisë shqiptare. Pas një procesi disavjeçar të pastrimit të portofolit nga kreditë e këqija dhe ngadalësimi drastik të kredisë së re, ky segment i tregut në në fund duket se po gjen një farë frymëmarrjeje. Ndërkohë që kredia për individët po konfirmon edhe këtë vit vijimësinë e ciklit të rritjes pozitive. Në fund të majit, portofoli i kredisë për familjet shqiptare arriti në 188.3 miliardë lekë, në rritje me 5% krahasuar me të njëjtën periudhë të vitit të kaluar. Banka e Shqipërisë gjatë këtij viti është shprehur optimiste për rritjen e kreditimit e ekonomisë. Në veçanti, mbyllja e ristrukturimit të sistemit përmes disa shitblerjeve të rëndësishme, pritet ta kthejë fokusin e bankave drejt zgjerimit të biznesit dhe të rrisë ofertën për kredi.
Depozitat
Depozitat në sistemin bankar shënuan rënie për të tretin muaj radhazi në maj, duke reflektuar kryesisht tkurrjen e kursimeve në valutë. Sipas statistikave të publikuara sot nga Banka e Shqipërisë, stoku i depozitave që zotëroheshin nga individët, bizneset, institucionet shtetërore, organizatat jofitimprurëse etj., ishte 994 miliardë lekë në fund të muajit maj. Në krahasim me muajin e mëparshëm, stoku është ulur me 4.5 miliardë lekë. Ndërsa që nga janari i këtij viti, depozita janë tkurrur me mbi 9 miliardë lekë. Me bazë vjetore, maj 2019/maj 2018, depozitat janë rritur me 25,8 miliardë lekë ose2.6%. Pesha e depozitave në valutë në muajin maj ishte 53.7 ..% e totalit, nga 52.6.% që ishte në të njëjtën periudhë të një viti më parë. Siç shihet politika nda deeuroizmit nuk dha efekte pasi depozita në valutë janë rritur më tej. Ndonëse Banka e Shqipërisë ka nisur prej mese një viti një fushatë kundër nivelit të lartë të euroizimit të ekonomisë, kursimet ne valutë, kryesisht euro mbeten të preferuara.